ၵႃးပိၼ်ႈ ၼႂ်းၸႄႈဝဵင်းလႃႈသဵဝ်ႈ မီးၵူၼ်းလူႉတၢႆၼိုင်ႈၵေႃႉ မၢတ်ႇၸဵပ်း 22 ၵေႃႉ
ၵႃး 6 လေႃႉ လမ်းၼိုင်ႈ လုၵ်ႉတၢင်း ဢိူင်ႇၵွင်းၵေးသေ တေမႃးတၢင်းဢိူင်ႇဢီႇၼၢႆးၸႄႈဝဵင်းလႃႈသဵဝ်ႈၼၼ်ႉ ပိၼ်ႈၶႂမ်ႈလႄႈ ၵူၼ်းမႃးၸွမ်းၼႂ်းၵႃး လူႉတၢႆၼိုင်ႈၵေႃႉလႄႈ မၢတ်ႇၸဵပ်း 22 ၵေႃႉ ဝႃႈၼႆ။
ဝၼ်းတီႈ 18/10/2017 ယၢမ်းၵၢင်ၶိုၼ်း11:30 မူင်းပၢႆၼၼ်ႉ ၵူၼ်းဝၢၼ်ႈ ၼႂ်းဢိူင်ႇဢီႇၼၢႆး ဢွၼ်ၵၼ်ၵႂႃႇၵၼ်ႇတေႃး ႁူဝ်ဝတ်ႉ(ၵျွင်း) တီႈဝၢၼ်ႈၵွင်းၵေးသေ တေပွၵ်ႈၶိုၼ်းႁိူၼ်းၼၼ်ႉ ၵႃးလူင် 6 လေႃႉ လမ်းၼိုင်ႈ တၢင်ႇၵူၼ်း မႃးမွၵ်ႈ 20 ၵေႃႉမႃးပိၼ်ႈၶႂမ်ႈ ၼိူဝ်သဵၼ်ႈတၢင်းလူင် ၼႂ်းၵႄႈဢိူင်ႇၵွင်းၵေးတင်းဢိူင်ႇဢီႇၼၢႆး ၸႄႈဝဵင်းလႃႈသဵဝ်ႈ ၸိုင်ႈတႆး ပွတ်းႁွင်ႇ။ ၽူႈၸၢႆးၵေႃႉၼိုင်ႈ ၸၢႆးပီး လႆႈလူႉတၢႆထင်တီႈ။ လိူဝ်ၼၼ်ႉ မၢတ်ႇၸဵပ်း 22 ၵေႃႉ လႆႈသူင်ႇယူတ်းယႃ ဝႆႉတီႈႁူင်းယႃလႃႈသဵဝ်ႈ ဝႃႈၼႆ။
ၸၢႆးဝၼ်းလႅင်းၶမ်း ၽူႈတႅၼ်းသၽႃးၸိူဝ်ႉၸၢတ်ႈ ပႃႇတီႇႁူဝ်သိူဝ် ၸႄႈတွၼ်ႈလႃႈသဵဝ်ႈ လၢတ်ႈတီႈၸုမ်းၶၢဝ်ႇၽူႈတွႆႇ ႁွၵ်ႈဝႃႈ “ မိူဝ်ႈဝႃးၼႆႉ ပဵၼ်ပွႆးၽြႃးၼႆသေ ၵူၼ်းမိူင်းႁဝ်း ၼႂ်းဢိူင်ႇဢီႇၼၢႆး ဢွၼ်ၵၼ်ၵႂႃႇၵၼ်ႇတေႃးပဵၼ်မူႇပဵၼ်ၸုမ်း တီႈဝၢၼ်ႈၵွင်းၵေးသေ ပွၵ်ႈၶိုၼ်းမႃးၼၼ်ႉ လူတ်ႉၵႃး ဢၼ်ပီႈၼွင်ႉၵူၼ်းဝၢၼ်ႈႁဝ်းၶီႇမႃးလမ်းၼၼ်ႉ သမ်ႉပဵၼ် လူတ်ႉၵႃး ဢမ်ႇပေႃးလီ ပဵၼ်လူတ်ႉၵႃး ဢၼ်တၢင်ႇလိၼ်တၢင်ႇသၢႆး။ လႆႈႁူႉဝႃႈ ၶိူင်ႈၸၢၵ်ႈမၼ်းဢမ်ႇ ပေႃးလီၼႆသေ ၶိူင်ႈၸၢၵ်ႈဢၼ်ဝႃႈ(တႂ်းလွတ်ႉ) ၼႆၼၼ်ႉ လုတ်ႈဢွၵ်ႇလႄႈလႆႈပိၼ်ႈၵႂႃႇ” ဝႃႈၼႆ။
သိုပ်ႇလၢတ်ႈဝႃႈ ၵူၼ်းၵေႃႉတၢႆထင်တီႈ ၸၢႆးပီးၼၼ်ႉ ၸွမ်းတူဝ်မၼ်းၸၢႆးဢမ်ႇမီးလွင်ႈမၢတ်ႇၸဵပ်းသင် ထၢင်ႇတႄႉ တေတုမ်ႉယွၼ်ႈတၢင်းၼႂ်း။ လိူဝ်ၼၼ်ႉ ဢၼ်မၢတ်ႇၸဵပ်းႁၢဝ်ႈႁႅင်း 3 ၵေႃႉသမ်ႉ ၵေႃႉၼိုင်ႈႁူၺ်ႇတႃလၼ်ဢွၵ်ႇ ၸိူဝ်းတိူဝ်ႉၺႃးတီႈၼႃႈတႃၼမ်ဝႆႉ ဝႃႈၼႆ။
ယူႇတီႈၸုမ်းၸွႆႈထႅမ်ၶႅၵ်ႇလီပၢင်ၸႃႉ ပွၵ်ႉ 9 ၸႄႈဝဵင်းလႃႈသဵဝ်ႈ လႆႈမႃးၸွႆႈထႅမ်ဢဝ်တူဝ် ၵူၼ်းမၢတ်ႇၸဵပ်းၸိူဝ်း ၼၼ်ႉ သူင်ႇယူတ်းယႃတူဝ်ဝႆႉတီႈ ႁူင်းယႃၸႄႈဝဵင်းလႃႈသဵဝ်ႈ ဝႃႈၼႆ။
တေႃႈလဵဝ် ယူႇတီႈၸဝ်ႈၼႃႈတီႈပလိၵ်ႈၸႄႈဝဵင်းလႃႈသဵဝ်ႈ လႆႈၵုမ်းတူဝ်ၵူၼ်းႁေႃႈလူတ်ႉလႄႈ လူတ်ႉၵႃးဝႆႉတီႈ ႁူင်းပလိၵ်ႈၸႄႈဝဵင်းလႃႈသဵဝ်ႈဝႆႉလႄႈ ၵူၼ်းႁိူၼ်းၵူၼ်းယေးၵေႃႈ ပဵၼ်ၼမ်ႉႁူၼမ်ႉတႃ ၸွမ်းဝႆႉယူႇ ဝႃႈၼႆ။
ၶေႃႈမုၼ်း / ပၢင်လူင်
No comments:
Post a Comment