ပႃႇတီႇမႂ်ႇသုင်ၸိုင်ႈတႆးႁူမ်ႈမိုဝ်းၵၼ်တင်း ၸုမ်းၸွႆႈထႅမ်ႁႅင်းၵၢၼ်ယၢၼ်မိူင်းလၢႆလၢႆၸုမ်းသေၸွႆႈထႅမ်ပီႈၼွင်ႉႁႅင်းၵၢၼ်ယၢၼ်မိူင်းပွၵ်ႈၶိုၼ်းႁိူၼ်း

 19 July 2017

 

ဝၢႆးသေ လုမ်းပွင်ၵၢၼ်လူင်ပွင်ၸိုင်ႈထႆး ၽၢႆႇႁႅင်းၵၢၼ်ၸိုင်ႈထႆးၶဝ် ဢွၵ်ႇမၢႆမီႈပၵ်းပိူင် ႁႅင်းၵၢၼ်ၶၢမ်ႈမိူင်းၽိတ်းမၢႆမီႈသေ ၵူတ်ႇထတ်းႁၢဝ်ႉႁၢဝ်ႉႁႅင်းႁႅင်းမႃးၼၼ်ႉၵူၼ်းၸၢဝ်းၶိူဝ်းဢၼ်ၸိူဝ်းပဵၼ်ႁႅင်းၵၢၼ်

ယၢၼ် မိူင်းဢၼ်ဢမ်ႇမီးဝတ်းဝႂ်တဵမ်ထူၼ်ႈၼၼ်ႉ လႆႈယၢပ်ႇၽိုတ်ႇသေ တႃႇတေဝၢႆႇပွၵ်ႈၶိုၼ်းႁိူၼ်းၵေႃႈၶၢၼ်ၸႂ်လႄႈ ဝၼ်းထီႉ(7.7.2017)ၼၼ်ႉ ယူႇတီႈၵေႃပွင်ၵၢၼ်ၽွမ်ႉႁူမ်ႈပီႈၼွင်ႉတႆးမိူင်းၵွၵ်ႇ၊ ၸိုင်ႈထႆးၶဝ်ၸင်ႇ လႆႈၵွင်ႉသၢၼ်ႁူမ်ႈမိုဝ်းၵၼ် တင်းပႃႇတီႇၵၢၼ်မိူင်းလၢႆလၢႆၸုမ်း၊ ပႃႇတီႇမႂ်ႇသုင်ၸိုင်ႈတႆးလႄႈ ၶွင်ႇသီႇဢဝ်ၶိုၼ်းၸိုင်ႈတႆးၶဝ်သေ ၸွႆႈထႅမ်ပီႈၼွင်ႉၸၢဝ်းၶိူဝ်းၶဝ် ဝၢႆႇပွၵ်ႈၶိုၼ်းႁိူၼ်း။

  

ဝၼ်းထီႉ(9.7.2017)ၼၼ်ႉ ယူႇတီႈငဝ်ႈငုၼ်းပႃႇတီႇမႂ်ႇသုင်ၸိုင်ႈတႆးသေ သူင်ႇငိုၼ်းၵႂႃႇပၼ်(60)သႅၼ် တီႈၵေႃပွင်ၵၢၼ်ၽွမ်ႉႁူမ်ႈပီႈၼွင်ႉတႆးၶဝ်ႁႂ်ႈပဵၼ်ၵႃႈၸႂ်ႉၸၢႆႇၵူႈလွင်ႈလွင်ႈတႃႇပီႈၼွင်ႉႁႅင်းၵၢၼ်ယၢၼ်
မိူင်းၶဝ်ႁႂ်ႈပေႃးထိုင်တီႈ လႅၼ်လိၼ်လႄႈ သူင်ႇၽူႈတၢင်တူဝ်ၵႂႃႇႁူမ်ႈႁွမ်းၸွမ်းလၢႆမူႇလၢႆၸုမ်းသေပႆႉႁပ်ႉပီႈၼွင်ႉႁႅင်းၵၢၼ်ႇယၢၼ်မိူင်းၶဝ် တီႈလၢၼ်ႇလႅၼ်လိၼ်။ ဝၼ်းထီႉ(17.7.2017)ၼၼ်ႉ လုၵ်ႉတီႈလုမ်းၵပ်းသၢၼ် ၶွင်ႇဢဝ်ၶိုၼ်းၸိုင်ႈတႆး၊ ၵဵင်းမႆႇၶဝ်ႁူပ်ႈၸူႉပီႈၼွင်ႉၵူႈၸၢဝ်းၶိူဝ်း(37)ၵေႃႉသေ သူင်ႇမႃးလႄႈ ဝၼ်းထီႉ(18.7.2017)ၼၼ်ႉ ၵေႃပွင်ၵၢၼ်ၽွမ်ႉႁူမ်ႈပီႈၼွင်ႉတႆးမိူင်းၵွၵ်ႇၶဝ် သူင်ႇမႃး(33)ၵေႃႉၸိူဝ်းၼႆႉသေ သူင်ႇထိုင်တီႈမႄႈသၢႆ။ ၸုမ်းCaring and Negotiating Committee for Myanmar Citizens(CNCMC)ၶဝ် သိုပ်ႇႁပ်ႉၶၢမ်ႈလၢၼ်ႇ လႅၼ်လိၼ်ၸၢပ်ႈၵၼ်ၼၼ်ႉသေ သူင်ႇထိုင်ၼႂ်းမိုဝ်းၽူႈတၢင်တူဝ်ၵူႈၸုမ်းၸုမ်း ၸိူဝ်းဢၼ်ပႂ်ႉႁပ်ႉပီႈ ၼွင်ႉႁႅင်းၵၢၼ်ယၢၼ်မိူင်း ၵူႈၸၢဝ်းၶိူဝ်းၶဝ်သူင်ႇထိုင်ႁိူၼ်းယေးၶိုၼ်း။

ဢိင်ၼိူဝ်လွင်ႈတၢင်းၼႆႉသေ ၸၢႆးမွင်ႇမျူႉ(ၽူႈတၢင်တူဝ်SSPP/SSA ဢၼ်ႁပ်ႉပုၼ်ႈၽွၼ်းၸွႆႈႁပ်ႉသူင်ႇ) မွၵ်ႇလၢတ်ႈဝႃႈ - ၸိူဝ်းဢၼ်တေၶီႇလူတ်ႉမိူဝ်းမီး(28)ၵေႃႉသေလႆႈၸတ်းပၼ်လူတ်ႉ ၸွႆႈထႅမ်ပၼ်ငိုၼ်းတေႃႇပေႃးထိုင်ႁိူၼ်း၊ ၸိူဝ်းဢၼ်တေၶီႇၶိူင်ႈမိၼ်မိူဝ်းၼၼ်ႉသမ်ႉလႆႈၸွႆႈပၼ် ငိုၼ်းၸူၵ်းၸၢႆႇၸွမ်းတၢင်း ၵွပ်ႈၶဝ်ဝႃႈမီးငိုၼ်းၵႃႈမႂ်ၶိူင်ႈႁိူဝ်းမိၼ်ႇယူႇၼႆ။ မၢင်ၸိူဝ်းၵေႃႈဢမ်ႇပႆႇမိူဝ်းလႄႈၸွႆႈထႅမ်ပၼ်တီႈယူႇတီႈၼွၼ်း၊တီႈၵိၼ်ယႅမ်ႉ လႄႈငိုၼ်းၸူၵ်းၸၢႆႇၶဝ်ၼႆ။ မၢင်ၸိူဝ်းသမ်ႉပဵၼ်မႄႈမၢၼ်းလႄႈပဵၼ်မႄႈလုၵ်ႈဢွၼ်ႇၼႂ်းလိူၼ်ၶဝ်ၸိူဝ်းၼႆႉၵေႃႈ လႆႈၸွႆႈထႅမ်ပၼ်ပႃး ၵႃႈၶဝ်ႈၼူမ်းလုၵ်ႈဢွၼ်ႇၶဝ်ၼႆ။ သိုပ်ႇထႅင်ႈတၢင်း ၼႃႈၼႆႉၵေႃႈ ယူႇတီႈၵေႃပွင်ႈၵၢၼ်ၽွမ်ႉႁူမ်ႈပီႈၼွင်ႉတႆးၶဝ် တိုၵ်ႉၶွၼ်ႈၵူၼ်းတႃႇတေသူင်ႇမႃးထႅင်ႈယူႇ ဝႃႈၼႆ။

ၵဵဝ်ႇလူၺ်ႈလွင်ႈတၢင်း ၵူႈမူႇၵူႈၸုမ်းၼႆႉသေ ၵူၼ်းမိူင်းၵေႃႉၼိုင်ႈမွၵ်ႇလၢတ်ႈဝႃႈ - ငိၼ်းၸူမ်းတေႉတေႉ တီႈမီးပႃႇတီႇလၢႆလၢႆၸုမ်းလႄႈ တပ်ႉသိုၵ်းၸိုင်ႈတႆးႁဝ်းၶဝ် မႃးပႆႉႁပ်ႉသေ ၸွႆႈထႅမ်ၵူႈလွင်ႈလွင်ႈ တေႃႇပေႃးႁွတ်ႈထိုင်ႁိူၼ်း။ တႃႇတေၶိုၼ်းမႃးမိူင်းထႆးၶိုၼ်းၼႆႉ ဢမ်ႇမီးၸႂ်ယဝ်ႉၼႆ တေမိူင်းႁိူၼ်းၶိုၼ်းသေ ႁဵတ်းၵိၼ်ၵၢၼ်ႁႆႈၼႃးၵူၺ်းယဝ်ႉ ဝႃႈၼႆ။ ပီႈၼွင်ႉႁႅင်းၵၢၼ်ယၢၼ်မိူင်းၸိူဝ်းၵမ်ႈပႃႈၼမ် ပဵၼ်တႆးသေ ၵမ်ႈၽွင်ႈၵေႃႈ လႆႈႁဵတ်းၵၢၼ်ထိုင် (20)ပီပၢႆယဝ်ႉ ၵမ်ႈၽွင်ႈသမ်ႉတိုၵ်ႉၶဝ်ႈႁႃၵၢၼ်ၵူၺ်းလႄႈ ႁႅင်းၵၢၼ်ပွၵ်ႈၶိုၼ်းႁိူၼ်းၼႆႉ ယင်းတိုၵ်ႉတိူဝ်းၼမ်ၶိုၼ်ႈမႃးယူႇ ၼႆၶၢဝ်ႇၼင်ႇၼႆၶႃႈ။

ၶၢဝ်ႇ - ၼုမ်ႇတႆး

SSPP/SSA ၸတ်းႁဵတ်းပၢင်ၵႅဝ်ႈလူင်းလိုဝ်ႈပၢင်ပူင်သွၼ် ငဝ်ႈၶၢမ်ႇပိုၼ်ႉၵၢၼ်ပၢႆးမိူင်းလႄႈၵၢၼ်ၽဵဝ်ႈမူၺ်ႉယႃႈမဝ်းၵမ်

 

ဝၼ်းထီႉ(23.7.2017)၊ ယၢမ်း(08:00)မူင်းၼၼ်ႉ ငဝ်ႈငုၼ်းပႃႇတီႇမႂ်ႇသုင်ၸိုင်ႈတႆး/တပ်ႉသိုၵ်းၸိုင်ႈတႆးၸတ်းႁဵတ်းပၢင်ၵႅဝ်ႈလူင်းလိုဝ်ႈပၢင်ပူင်သွၼ် ငဝ်ႈၶၢမ်ႇပိုၼ်ႉၵၢၼ်ပၢႆးမိူင်းလႄႈၵၢၼ်ၽဵဝ်ႈမူၺ်ႉယႃႈမဝ်း ၵမ် တီႈႁူင်းႁေႃးလူင်ႁူင်းႁဵၼ်းသိုၵ်းငဝ်ႈငုၼ်း ႁူဝ်ပဝ်ႈလူင် ၸွမ်သိုၵ်းလူင် ၸဝ်ႈပၢင်ႇၾႃႉ၊ ၵေႃႇမတီႇငဝ်ႈငုၼ်းလႄႈ ၽၢႆႇဢုပ်ႉပိူင်ႇၼႂ်းၼႃႈတီႈၵုမ်းၵမ် ပႃႇတီႇမႂ်ႇသုင်ၸိုင်ႈတႆး/တပ်ႉသိုၵ်းၸိုင်ႈတႆး ၵူႈတီႈတီႈလႄႈ သိုၵ်းႁၢၼ်တေႃႇၽူႈမီးၸၼ်ႉၶိုၼ်ႈႁွတ်ႈတင်းမူတ်း (336)ၵေႃႉ။

ပၢင်ပူင်သွၼ် ငဝ်ႈၶၢမ်ႇပိုၼ်ႉၵၢၼ်ပၢႆးမိူင်းလႄႈ ၵၢၼ်ၽဵဝ်ႈမူၺ်ႉယႃႈမဝ်းၵမ်ၼႆႉ တေႇပိုတ်ႇၽုၺ်ႇမႃး မိူဝ်ႈဝၼ်းထီႉ(15.5.2017)ၼၼ်ႉသေ ပူင်သွၼ်ပၼ်ၵူၼ်းသိုၵ်းဢိၵ်ႇၽူႈမီးၸၼ်ႉတေႇၸဵမ်ၵေႃႇမတီႇငဝ်ႈငုၼ်းတေႃႇထိုင်ၵူႈတပ်ႉၵူႈႁွင်ႈၵၢၼ်၊ ၽၢႆႇဢုပ်ႉပိူင်ႇၵူႈတီႈတီႈၶဝ်ၸိူဝ်းၼႆႉ။ၼႂ်းပၢင်သွၼ်ၼႆႉ ပူင်သွၼ်ပၼ် လွင်ႈတပ်ႉၼႂ်းၼႃႈတီႈ၊ ၽၢႆႇဢုပ်ႉပိူင်ႇၼႂ်းၼႃႈတီႈ တင်းသဵင်ႈ တေလႆႈယူႇသဝ်းၵိၼ်သၢင်ႈၵႂႃႇ ၸိူင်ႉ ႁိုဝ်၊ တေလႆႈၶဝ်ႈဢွၵ်ႇပေႃႈမႄႈၵူၼ်းမိူင်းၸိူင်ႉႁိုဝ်၊ လွင်ႈႁဵတ်းၸဝ်ႈႁဵတ်းၶုၼ်ပေႉၵိၼ်ၼိူဝ်ပေႃႈမႄႈၵူၼ်းမိူင်းၸိုင် တေလႆႈႁပ်ႉတၢမ်ႇတၢင်းၽိတ်းၸိူင်ႉႁိုဝ်၊ လွင်ႈၵၢၼ်ပၢႆးမိူင်း၊ လွင်ႈသုၼ်ႇလႆႈသုၼ်ႇ ပဵၼ်ၵူၼ်းလႄႈ လွင်ႈတေလႆႈၵေႃႇသၢင်ႈဝၢၼ်ႈမူၼ်းၵူၼ်းၵိုၼ်းၵႂႃႇၸိူင်ႉႁိုဝ် ၸိူဝ်းၼႆႉၵႂႃႇ။ ၽၢႆႇယႃႈမဝ်းၵမ်ၸမ်ႉပူင်သွၼ်ပၼ် လၢႆးၽဵဝ်ႈမူၺ်ႉၵူတ်ႇထတ်းယႃႈမဝ်းၵမ်၊ လၢႆးတူၺ်းလၵ်ႉၶၼႃႇၵူၼ်းၵိၼ်ယႃႈ မဝ်းၵမ်၊ ၽွၼ်းႁၢႆႉယႃႈမဝ်းၵမ်လႄႈ လၢႆးပၼ်တၢမ်ႇၵူၼ်းၶၢႆယႃႈမဝ်းၵမ်ၸိူဝ်းၼႆႉ။

ၵဵဝ်ႇလူၺ်ႈလွင်ႈပၢင်သွၼ်ၼႆႉသေ ႁူဝ်ပဝ်ႈလူင် ၸွမ်သိုၵ်းလူင်/ၸဝ်ႈပၢင်ၾႃႉ မွၵ်ႇလၢတ်ႈဝႃႈ - ယိူင်းဢၢၼ်းႁႂ်ႈၵူၼ်းသိုၵ်းႁဝ်းၶဝ် ႁူႉလွင်ႈၽွၼ်းၸႃႉယႃႈမဝ်းၵမ်လႄႈ ၵၢၼ်ဢုပ်ႉပိူင်ႇၸိူဝ်းၼႆႉသေႁႂ်ႈမေႃ ၸႅၵ်ႇၽႄလွင်ႈလီလွင်ႈၸႃႉမၼ်းယဝ်ႉ ငိူင်ႉဝႄႈမၼ်း၊ ဝၢႆးပၢင်သွၼ်ၼႆႉယဝ်ႉၼႆႁဝ်းၶႃႈ ယူႇတီႈငဝ်ႈငုၼ်းပႃႇတီႇမႂ်ႇသုင်ၸိုင်ႈတႆးသေ တေႁဵတ်းသၢင်ႈၵၢၼ်ၽဵဝ်ႈမူၺ်ႉယႃႈမဝ်းၵမ်လႄႈလူင်းထတ်းသၢင်ႈၵၢၼ် ၽၢႆႇဢုပ်ႉပိူင်ႇၼႆႉၵႂႃႇ၊ သူင်ႇသင်ႇထိုင်ၽူႈၶိုၼ်ႈႁွတ်ႈပၢင်သွၼ်တၢင်းသဵင်ႈ ပေႃးမီးၸၼ်ႉမႃး ယႃႇပေလိုမ်းၽဝၸဝ်ႈၵဝ်ႇ၊ ပေႃးပဵၼ်သိုၵ်းမႃးၼႆႉ တေလႆႈၺႃးပွႆးတိုၵ်းၵူႈပၢႆးပၢႆး၊ လွင်ႈႁူမ်ႇလူမ်ႈပေႃႈမႄႈၵူၼ်းမိူင်း ၶူဝ်းၶွင်ဢုၵ်ႉၸႃႇပေႃႈမႄႈၵူၼ်းမိူင်းၸိူဝ်းၼႆႉတေလႆႈတူၺ်းထိုင်ၸွႆႈထႅမ်ပၼ် ဝႃႈၼႆ။

ဝၢႆးသေ ပၢင်ၸုတ်ႇၽဝ်ယႃႈမဝ်းၵမ် မိူဝ်ႈဝၼ်းသၢၼ်ၶတ်းယႃႈမဝ်းၵမ်လုမ်ႈၾႃႉၼၼ်ႉယဝ်ႉ ငဝ်ႈငုၼ်းပႃႇတီႇမႂ်ႇသုင်ၸိုင်ႈတႆးၼႆႉ ႁဵတ်းသၢင်ႈၵၢၼ်ၽဵဝ်ႈမူၺ်ႉယႃႈမဝ်းၵမ်မႃးၵႂၢင်ႈၵႂၢင်ႈၶႂၢင်ၶႂၢင်သေ တွၼ်ႈတႃႇ ၵူၼ်းမိူင်းၸိူဝ်းၽုၵ်ႇယႃႈ တေႁႃပၢႆးၽုၵ်ႇသူမ်ႈတၢင်တႅၼ်း ပၼ်ပႃးၸိူဝ်ႉၽၼ်းတႃႇၽုၵ်ႇသွမ်ႈတႅၼ်းတၢင်ယႃႈမဝ်းၵမ်ၵႂႃႇဝႃႈၼႆ။

www.ssppssa.org
ၶၢဝ်ႇ - ၼုမ်ႇတႆး