~~~~~~ ႁဝ်းၵေႃႈမီးဢူႈထဝ်ႈယူႇ ~~~~~~
_____________________________________
မိူဝ်ႈပွၵ်ႈၼိုင်ႈ မီးၵူၼ်းၶၢႆမၢၵ်ႇႁူဝ်ၵေႃႉၼိုင်ႈ
ဢဝ်မၢၵ်ႇႁူဝ်မၼ်းသႂ်ႇၵူၺ်သေ ႁၢပ်ႇၵူၺ်မၢၵ်ႇႁူဝ်မၼ်းဢွၵ်ႇႁိူၼ်းၵႂႃႇႁႃၶၢႆမၢၵ်ႇႁူဝ်မၼ်းယူႇယဝ်ႉ
ယွၼ်ႉလႅတ်ႇမႆႈၼႃႇလႄႈ မၼ်းၸင်ႇဢဝ်မၢၵ်ႇႁူဝ်ၼႂ်းၵူၺ်ၼၼ်ႉႁူၺ်ႇၼိုင်ႈတိုဝ်းတႃႇမၼ်းဝႆႉယဝ်ႉ
ဢွၵ်ႇတၢင်းမႃးၵႆတၢၼ်ႇꧦယွၼ်ႉႁိူဝ်ႉမွႆႈၼႃႇယဝ်ႉလႄႈ ၸင်ႇတမ်းႁၢပ်ႇၵူၺ်မၢၵ်ႇႁူဝ်မၼ်းသေ ၶဝ်ႈၼင်ႈလိုဝ်ႈႁိူဝ်ႉယူႇတင်ႈငဝ်ႈမႆႉႁုင်းလူင်ႁိမ်းၶၢင်ႈတၢင်းၼၼ်ႉယူႇယဝ်ႉ
သမ်ႉၼွၼ်းလပ်းပႅတ်ႈတီႈငဝ်ႈမႆႉၼၼ်ႉၵႅပ်ႉၼိုင်ႈ
ၽိူဝ်ႇမၼ်းတိုၼ်ႇမႃးသေ ဝၢႆႇတူၺ်းၵူၺ်မၢၵ်ႇႁူဝ်မၼ်းၵိုတ်းၵူၺ်ပဝ်ႇၵူၺ်း ဢမ်ႇမီးမၢၵ်ႇႁူဝ်ၼႂ်းမၼ်းသေႁူၺ်ႇယဝ်ႉ
ၵိုတ်းမၢၵ်ႇႁူဝ်ၼႂ်းမိုဝ်းမၼ်းၼၼ်ႉႁူၺ်ႇလဵဝ်ၵူၺ်းယဝ်ႉ
မၼ်းၵေႃႈထၢင်ႇဝႃႈပိူၼ်ႈမႃးလၵ်ႉဢဝ်မၢၵ်ႇႁူဝ်မၼ်းၵႂႃႇယဝ်ႉၼႆ
ၽိူဝ်ႇမၼ်းႁႃၵႂႃႇႁႃၶိုၼ်းသေမုင်ႈၶိုၼ်ႈၼိူဝ်တူၺ်းၼိူဝ်တူၼ်ႈမႆႉၼၼ်ႉ လႆႈႁၼ်ၽုင်လိင်းၼိူဝ်တူၼ်ႈမႆႉၼၼ်ႉပေႃးဢဝ်မၢၵ်ႇႁူဝ်မၼ်းသုပ်းႁူဝ်ၶဝ်လဵတ်ႈယူႇယဝ်ႉ
ၵမ်းၼၼ်ႉ မၼ်းၸင်ႇဝူၼ်ႉႁႃလၢႆးဢဝ်ၶိုၼ်းမၢၵ်ႇႁူဝ်မၼ်း
ယွၼ်ႉမၼ်းၵေႃႈပဵၼ်ၵူၼ်းၵႆႉလူလိၵ်ႈၵေႃႉၼိုင်ႈၼင်ႇၵဝ်ႇလႄႈ
ၸင်ႇဝႆႉၸႂ်ယဵၼ်ꧦသေႁႃလၢႆးၵႄႈပၼ်ႁႃၼႆႉယူႇယဝ်ႉ
ယူႇဢမ်ႇႁိုင်မၼ်းၸင်ႇဝူၼ်ႉလႆႈလၢႆးၼိုင်ႈ
မၼ်းၸင်ႇၵႂႃႇတီႈပၢင်ႇꧦတီႈလိင်းၶဝ်လႅပ်ႈတေႁၼ်မၼ်းၼၼ်ႉသေ
ဢဝ်မၢၵ်ႇႁူဝ်ၼႂ်းမိုဝ်းမၼ်းၼၼ်ႉၶိုၼ်းသုပ်းႁူဝ်မၼ်းၼႄၽုင်လိင်းၶဝ်ၼၼ်ႉယူႇ
ယဝ်ႉၵေႃႈမၼ်းၸင်ႇပူတ်းမၢၵ်ႇႁူဝ်မၼ်းသေ ယၢႆးႁူဝ်မၼ်းၼႄထႅင်ႈ
လိင်းၶဝ်ၸိူဝ်းၼၼ်ႉၵေႃႈၸင်ႇပူတ်းမၢၵ်ႇႁူဝ်ၶဝ်သေ ယၢႆးႁူဝ်ၶဝ်ယိူင်ႈၸွမ်းမၼ်းယဝ်ႉ
ၵမ်းၼၼ်ႉ မၼ်းႁဵတ်းၵႅင်ႈႁၢင်ႈမႆႈၼႃႇသေ ဢဝ်မၢၵ်ႇႁူဝ်မၼ်းထိုမ်ႈတူၵ်းၼိူဝ်လိၼ်ၼၼ်ႉယဝ်ႉ
လိင်းၶဝ်ၼၼ်ႉၵေႃႈ ႁၼ်မၼ်းႁဵတ်းၼၼ်လႄႈ ၶဝ်ၵေႃႈဢဝ်မၢၵ်ႇႁူဝ်ၶဝ်ထိုမ်ႈတူၵ်းလိၼ်ယိူၼ်ႈမၼ်းထႅင်ႈယဝ်ႉ
ၵမ်းၼၼ်ႉ မၼ်းၵေႃႈၸင်ႇၼႅတ်ႈလႅၼ်ႈၵႂႃႇၵဵပ်းဢဝ်ၶိုၼ်းမၢၵ်ႇႁူဝ်မၼ်းၼၼ်ႉသေ
လႆႈၶိုၼ်းမၢၵ်ႇႁူဝ်မၼ်းတင်းမူတ်းသေယဝ်ႉ သိုပ်ႇဢွၵ်ႇတၢင်းၵႂႃႇႁႃၶၢႆမၢၵ်ႇႁူဝ်မၼ်းထႅင်ႈယူႇယဝ်ႉ ၊
ၵူၼ်းၶၢႆမၢၵ်ႇႁူဝ်ၼၼ်ႉမီးဝႆႉလၢၼ်ၸၢႆးဢွၼ်ႇၵေႃႉၼိုင်ႈ
ႁိုင်ပူၼ်ႉမႃး(20)ပီ လၢၼ်ၸၢႆးမၼ်းၵေႃႈ
ပုတ်ႈဢဝ်ၵၢၼ်ဢူႈထဝ်ႈၶဝ် ႁၢပ်ႇဢဝ်ၵူၺ်မၢၵ်ႇႁူဝ်သေ ဢွၵ်ႇႁႃၶၢႆမၢၵ်ႇႁူဝ်ထႅင်ႈၼင်ႇၵဝ်ႇ
မၼ်းၸၢႆးၶိုၼ်းၵႂႃႇလိုဝ်ႈၺႃးမႅၼ်ႈတႂ်ႈငဝ်ႈမႆႉႁုင်းလူင်ႁိမ်းၽင်ႇတၢင်း တီႈဢူႈထဝ်ႈမၼ်းၸၢႆးယၢမ်ႈမႃးလိုဝ်ႈမိူဝ်ႈပူၼ်ႉမႃးၼၼ်ႉယဝ်ႉ
ၸၢႆးဢွၼ်ႇၼၼ်ႉၵေႃႈမႃးလိုဝ်ႈႁိူဝ်ႉ တမ်းၵူၺ်မၼ်းၸၢႆးသေ ဢဝ်ၼွၼ်းလပ်းပႅတ်ႈတႂ်ႈငဝ်ႈမႆႉၼၼ်ႉထႅင်ႈၼင်ႇၵဝ်ႇ
ၽိူဝ်ႇမၼ်းၸၢႆးတိုၼ်ႇမႃး လိင်းၶဝ်ပေႃးတၼ်းဢဝ်မၢၵ်ႇႁူဝ်ၼႂ်းၵူၺ်းမၼ်းၸၢႆးၼၼ်ႉ ၵႂႃႇတိုဝ်းလဵၼ်ႈယူႇၼိူဝ်တူၼ်ႈမႆႉပုၼ်ႉမူတ်းယဝ်ႉ
မၼ်းၸၢႆးၸင်ႇၶုၵ်းၸႂ်လႆႈဢၼ်ဢူႈထဝ်ႈမၼ်းယၢမ်ႈလၢတ်ႈၼႄၼၼ်ႉသေ
ၼင်ႇႁိုဝ်တေလႆႈၶိုၼ်းမၢၵ်ႇႁူဝ်မၼ်းၸၢႆးၼၼ်ႉ ၸင်ႇဢၢင်ႈတေၸႂ်ႉလၢႆးဢူႈထဝ်ႈမၼ်းၸၢႆးၼၼ်ႉယဝ်ႉ
မၼ်းၸၢႆးၵေႃႈၸင်ႇပူတ်းဢဝ်မၢၵ်ႇႁူဝ်မၼ်းၼၼ်ႉသေ ယၢႆးႁူဝ်မၼ်းၼႄလိင်းၼိူဝ်တူၼ်ႈမႆႉၸိူဝ်းၼၼ်ႉယူႇ
လိင်းၶဝ်ၵေႃႈပူတ်းမၢၵ်ႇႁူဝ်ၶဝ်သေ ယၢႆးႁူဝ်ၶဝ်ယိူင်ႈၸွမ်းမၼ်းၸၢႆးယူႇ
ၵမ်းၼၼ်ႉ မၼ်းၸၢႆးၸင်ႈဢဝ်မၢၵ်ႇႁူဝ်မၼ်းထိုမ်ႈလူင်းၼိူဝ်လိၼ်ၼၼ်ႉထႅင်ႈ
ၵူၺ်းၵႃႈ. ဢမ်ႇမီးလိင်းတူဝ်လႂ်ဢဝ်မၢၵ်ႇႁူဝ်ၶဝ်ထိုမ်ႈတူၵ်းလူင်းမႃးသေတူဝ် ၽွင်းမၼ်းၸၢႆးတိုၵ်ႉမိူၼ်ႇတူၺ်းလိင်းၸိူဝ်းၼၼ်ႉယူႇၼၼ်ႉ
မီးလိင်းဢွၼ်ႇတူဝ်ၼိုင်ႈ ၼႅတ်ႈလႅတ်ႈလူင်းမႃးၵဵပ်းဢဝ်မၢၵ်ႇႁူဝ်ဢၼ်မၼ်းၸၢႆးထိုမ်ႈတူၵ်းဝႆႉၼၼ်ႉသေ
လၢတ်ႈၵႂၢမ်းၶေႃႈၼိုင်ႈတီႈမၼ်းၸၢႆးဝႃႈ
``သူၵူၺ်းမီးဢူႈထဝ်ႈဢမ်ႇၸႂ်ႈ ႁဝ်းၵေႃႈမီးဢူႈထဝ်ႈမိူၼ်ၵၼ်ယဝ်ႉ´´ ၼႆသေ ၼႅတ်ႈလႅတ်ႈၶိုၼ်ႈတူၼ်ႈမႆႉၵႂႃႇၶိုၼ်းယဝ်ႉ
မၼ်းၸၢႆးၵေႃႈဢမ်ႇၸၢင်ႈႁဵတ်းၸိူင်ႉႁိုဝ်ယဝ်ႉ ႁၢပ်ႇဢဝ်ၵူၺ်ပဝ်ႇမၼ်းၸၢႆးၼၼ်ႉသေ ပွၵ်ႈၶိုၼ်းႁိူၼ်းၵႂႃႇယဝ်ႉ ။ သုတ်းယဝ်ႉ
ႁဝ်းမီးဢူႈထဝ်ႈၵေႃႈ
ပိူၼ်ႈမီးဢူႈထဝ်ႈယူႇၼႆ ယႃႇလိုမ်း😃😃😃
31-5-2017
ပီႈမုၼ်တႆး - မိူင်းၼၢႆး
ၶိုၼ်းယိပ်းတမ်းပိၼ်ႇသမ်ႉၶႆႈၼႄ
